ஆசிரியர் தினத்தை முன்னிட்டு கட்டுரை, கவிதைப் போட்டிகள்

By சிவகங்கை

First Published : 27 August 2014 01:58 AM IST

தமிழ்நாடு அறிவியல் இயக்கம் சார்பில் செப்டம்பர் 5 ஆசிரியர் தினத்தை முன்னிட்டு மாணவர்கள், ஆசிரியர்கள்,சமூக ஆர்வலர்களுக்கு கட்டுரை, கவிதைப் போட்டிகள் நடத்தப்படுகிறது.

இதுகுறித்து சிவகங்கை மாவட்டத் தலைவர் சாஸ்தா சுந்தரம் கூறியது: செப்.5 ஆசிரியர் தினத்தையொட்டி மாநில அளவிலான போட்டிகளை தமிழ்நாடு அறிவியல் இயக்கம் நடத்துவதென தீர்மானித்துள்ளது.

9-ஆம் வகுப்பு முதல் 12-ஆம் வகுப்பு வரை என் இதயம் கவர்ந்த இனிய ஆசிரியர் என்ற தலைப்பில் ஏ-4 தாளில் 4 பக்கங்களுக்கு மிகாமலும், ஆசிரியர்கள் வகுப்பறையில் வசந்தம் என்ற தலைப்பில் 5 பக்கங்களுக்கு மிகாமலும், ஆர்வலர்கள் அரசுப்பள்ளிகள் நேற்று.. இன்று.. நாளை.. என்ற தலைப்பில் 5 பக்கங்களுக்கு மிகாமலும் கட்டுரைகளும், கல்லூரி மாணவர்கள், இப்படித்தான் இருக்கவேண்டும் வகுப்பறை என்ற தலைப்பில் 25 வரிகளுக்கு மிகாமல் கவிதையும் எழுதி படைப்புகளை, பி.சாஸ்தாசுந்தரம், மாவட்ட கல்வி ஒருங்கிணைப்பாளர் தமிழ்நாடு அறிவியல் இயக்கம், 373 சிலம்புதெரு, சிவகங்கை-2 என்ற முகவரிக்கு செப்டம்பர் 10ஆம் தேதிக்குள் அனுப்பிவைக்கலாம்.

மாவட்ட அளவில் ஒவ்வொருபிரிவிலும் தேர்வாகும் முதல் மூன்று படைப்புகள் மாநில அளவிலான போட்டிக்குத் தகுதிபெறும். செப்டம்பர் கடைசியில் நடைபெறும் விழாவில் பாராட்டுச்சான்றிதழ்கள் வழங்கப்படும் என்றார்.

நன்றி: தினமணி நாளிதழ்

அரசுப்பள்ளி-மக்கள் பள்ளி: பாதுகாப்போம்; பலப்படுத்துவோம் செப்.8ல் மாநில அளவிலான பிரச்சார இயக்கம் துவக்கம்

தமிழ்நாடு அறிவியல் இயக்கத்தின் மாவட்டச் செயலாளர்கள் கூட்டம் கடந்த ஞாயிறு அன்று (ஆக.24.2014) மாநிலத் தலைவர் பேராசிரியர் என்.மணி தலைமையில் சேலம் டான் போஸ்கோ அன்பு இல்லத்தில் நடைபெற்றது. அரசுப்பள்ளி மக்கள் பள்ளி பிரச்சார இயக்கத்தின் நோக்கங்கள் குறித்து பிரச்சாரத்தின் மாநில ஒருங்கிணைப்பாளர் தேனி.சுந்தர் விளக்கிப் பேசினார். மாநிலப் பொதுச்செயலாளர் எம்.எஸ்.ஸ்டீபன்நாதன் நிறைவுரையாற்றினார். அறிவியல் இயக்கத்தின் மாநில நிர்வாகிகளும் மாவட்டச் செயலாளர்களும் கலந்துகொண்டனர்.

1. குழந்தைகளுக்கு தரமான, சமமான கல்வியை வழங்குவது அரசின் கடமை..

2. ஒரு குழந்தை படித்தாலும் அரசு அப்பள்ளியை மூடக்கூடாது. தொடர்ந்து நடத்த வேண்டும்.

3. அனைத்து அரசுப் பள்ளிகளிலும் மழலையர் வகுப்புகளைத் தொடங்க வேண்டும்..

4.முறையற்ற அமலாக்கத்தினால் ஆசிரியர்களிடையே குழப்பத்தை ஏற்படுத்தியுள்ள செயல்வழிக்கற்றல் மற்றும் தொடர்மதிப்பீட்டு முறைகளை செழுமைப்படுத்திட வேண்டும்.

5.கல்விப் பணிகள் பாதிக்காதவண்ணம் நலத்திட்டப் பணிகளுக்கான தனி அலுவலர்களை நியமித்திட வேண்டும்.

6.அனைத்துப் பள்ளிகளிலும் நல்ல குடிநீர், சுகாதாரமான கழிப்பறை, ஒவ்வொரு வகுப்பிற்கும் தனித்தனி வகுப்பறைகள், வகுப்பிற்கொரு ஆசிரியர் என்பதை அரசு உத்தரவாதப்படுத்தவேண்டும்..

7. கல்வியில் தனியார்மயத்தைக் கைவிட வேண்டும்..

8. தனியார் பள்ளிகளில் குழந்தைகளைச் சேர்ப்பதற்கான எல்லைகளை (எத்தனை கிலோ மீட்டர் சுற்றளவு) வரையறுக்க வேண்டும்..

9. பள்ளிகளில் ஒரு வகுப்பில் எத்தனை குழந்தைகள் இருக்கலாம்.. ஒரு பள்ளியில் ஒரே வகுப்பிற்கு எத்தனை பிரிவுகள் இருக்கலாம் என்பதை தமிழக அரசு வரையறுக்க வேண்டும்..

10. அரசுப்பள்ளிகளைப் பாதுகாக்க மேலும் கூடுதலான நிதியை ஒதுக்கிட வேண்டும்.. 

11. பள்ளிக்கல்வியை மாநிலப் பட்டியலுக்கு மாற்றிடும் நடவடிக்கைகள் வேண்டும்..

12. முழுவதும் அரசின் செலவிலும் பொறுப்பிலுமான அருகமைப் பொதுப்பள்ளிகளை அமைத்து உண்மையான சமச்சீர் கல்வியை வழங்கிட வேண்டும்..

13. கல்வியில் பின் தங்கிய மற்றும் பின் தங்கா பகுதிகளில் மத்திய அரசு அமல்படுத்தி வருகின்ற அரசு, தனியார் கூட்டு மாதிரிப் பள்ளிகளைத் (Public PrIvate Partnership school-PPP) தமிழகத்தில் அனுமதிக்கக் கூடாது...

14. அரசுப்பள்ளிகள் என்பவை மக்களின் வரிப்பணத்தில் இயங்குபவை... மக்களுடைய பள்ளிகள்... குறைகளிலிருப்பின் சரிசெய்வதும் தேவைகளிருப்பின் போராடிப் பெறுவதும் மக்களின் கடமை...

என பல அம்சங்களை முன்வைத்து பிரச்சார இயக்கத்தினை செப்.8 உலக எழுத்தறிவு தினத்தன்று மாநில அளவில் சென்னையிலும் அனைத்து மாவட்டத் தலைநகரங்களிலும் துவங்கி இந்தக் கல்வியாண்டு முழுவதும் விரிவான அளவில் கொண்டுசெல்வது எனத் திட்டமிடப்பட்டுள்ளது..

.

கீழ்கண்டவாறு பிரச்சாரம் இயக்கம் திட்டமிடப்பட்டுள்ளது:

v பிரச்சாரத்தை செப்டம்பர் 8ல் பத்து இலட்சம் கையெழுத்து இயக்கத்தோடு மாநில மற்றும் அனைத்து மாவட்டத் தலைநகரங்களிலும் துவங்குவது ...

v செப்டம்பர் 19ல் பாவ்லோ பிரைரே பிறந்த நாளில் அனைத்து மாவட்டங்களிலும் சாதனை படைத்த அரசுப்பள்ளிகள், ஆசிரியர்கள், மாணவர்களுக்குப் பாராட்டுவிழா நடத்துவது...

v நவம்பர் 11- தேசிய கல்வி நாளில்.... கல்வி உரிமைக் கருத்தரங்குகள் நடத்துவது...

v பிப்ரவரி 21- உலகத்தாய்மொழி தினத்தில் அரசுப்பள்ளிகளில் ஆங்கிலவழிக் கல்வியைக் கைவிடக்கோரியும் ஆரம்பக் கல்வி முதல் ஆய்வுப் படிப்புகள் வரையிலும் அனைத்து நிலைகளிலும் அன்னைத் தமிழை மேம்படுத்துவதற்கான முயற்சிகளைத் தமிழக அரசு மேற்கொள்ள வலியுறுத்தியும் தாய்மொழிவழிக் கல்விக்கான மண்டல மாநாடுகள்

v மேற்கண்ட கருத்துகளை மையப்படுத்தி ஆவணப்படங்கள், பிரசுரங்கள், பாடல் ஒலிப்பேழைகள் கொண்டுவருவது, ஆய்வுகள் நடத்துவது

பிரச்சார இயக்கத்தை முன்னிட்டு ஆய்வுகள்:

v அடைக்கப்படும் நிலையிலுள்ள பள்ளிகளைக் கண்டறிதல்..

v ஓராசிரியர் மட்டுமே பணிபுரியும் பள்ளிகளைக் கண்டறிதல்..

v அரசுப் பள்ளிகளில் சேர்ப்பதற்கான தடைகளாய் மக்கள் கருதுவது என்ன?

v அரசுப்பள்ளிகளில் தங்கள் குழந்தைகளைச் சேர்த்துள்ள அரசு ஊழியர், ஆசிரியர் நேர்காணல்

v தற்போதும் சிறப்பாகச் செயல்படும் அரசு ஆரம்பப்பள்ளிகள், அதன் தன்மைகள் ஆய்வு

v ஆங்கிலவழிப் பிரிவு துவங்கிய அரசுப் பள்ளிகளில் ஏற்பட்டுள்ள முன்னேற்றம்

ஜனவரிக்குப் பின்பு தமிழகத்தின் நான்கு முனைகளிலிருந்து கலைப்பயணம் மேற்கொள்வது:

ஆய்வுகள், கலைப்பயணம், மக்கள் சந்திப்பின் மூலம் கிடைத்த முடிவுகளை அரசிடம் வலுயுறுத்துவது...

தேனி.சுந்தர், 

பிரச்சார இயக்கத்தின் மாநில ஒருங்கிணைப்பாளர், 

9488011128 / 9047140584

தமிழ்நாடு அறிவியல் இயக்கம் சார்பில் செப்.5 ஆசிரியர் தினத்தை முன்னிட்டு போட்டிகள் அறிவிப்பு

அன்புடையீர்

வணக்கம், தமிழ்நாடு அறிவியல் இயக்கம் சமூகத்தில் அறிவியல் விழிப்புணர்வை ஏற்படுத்தும் பொருட்டு பல்வேறு செயல்பாடுகளை மேற்கொண்டு வருகிறது.. அதேபோல படைப்பாற்றலை வளர்ப்பதாகவும் எதனையும் ஆய்வுக்கு உட்படுத்தும் சிந்தனையை வளர்ப்பதாகவும் கல்வி இருக்கவேண்டும்.. வகுப்பறைகள் பதில்சொல்லும் வகுப்பறைகளாகவே இருக்கின்றன.. கற்றல் கற்பித்தல் நிகழ்வுகளில் குழந்தைகள் பெரும்பாலும் கவனிக்கும் பங்கேற்பாளராக இருக்கின்ற நிலைமை மாறவேண்டும்.. கேள்விகள், விவாதங்கள் மாணவர்கள் மத்தியில் ஊக்குவிக்கப்படவேண்டும்.. அதற்கு வகுப்பறை ஜனநாயக உணர்வு தேவை.. ஆசிரியர்-மாணவர் உறவு மேம்படுவது அவசியம்..

எனவே அத்தகைய வகுப்பறைகளை உருவாக்குவதற்கான முயற்சியாக உலக அளவில் சிறந்த கல்வியாளர்களின் புத்தகங்களை அறிமுகப்படுத்தும் மாற்றுக்கல்விக்கான வாசிப்பு முகாம்கள், ஆசிரியர் இணையம் போன்ற முயற்சிகளை தமிழ்நாடு அறிவியல் இயக்கம் மேற்கொண்டு வருகிறது.. அதன் ஒரு பகுதியாக செப்.5 ஆசிரியர் தினத்தை முன்னிட்டு மாநில அளவிலான போட்டிகளை நடத்துவது என தீர்மானிக்கப்பட்டுள்ளது..

போட்டி விபரங்கள்

9-12 வகுப்பு மாணவர்கள் கட்டுரை என் இதயம் கவர்ந்த இனிய ஆசிரியர் A4 தாளில் 4 பக்கங்களுக்கு மிகாமல் 

 

ஆசிரியர்கள் கட்டுரை வகுப்பறையில் வசந்தம் A4 தாளில் 5 பக்கங்களுக்கு மிகாமல் 

 

ஆர்வலர்கள் கட்டுரை அரசுப்பள்ளிகள்: நேற்று.. இன்று.. நாளை..? A4 தாளில் 5 பக்கங்களுக்கு மிகாமல்

கல்லூரி மாணவர்கள் கவிதை இப்படித்தான் இருக்க வேண்டும் வகுப்பறை.. 25 வரிகளுக்கு மிகாமல்

போட்டி விதிமுறைகள்:
செப்.10ஆம் தேதிக்குள் அனுப்பிவைக்க வேண்டும்..

சொந்த படைப்பாக இருக்கவேண்டும்..

தெளிவான கையெழுத்தில் இருக்கலாம்.. தட்டச்சு செய்வது சிறப்பு.

பங்கேற்பாளர்களின் தொடர்பு முகவரி, அலைபேசி, மின்னஞ்சல் அவசியம்..

மாவட்ட அளவில் ஒவ்வொரு பிரிவிலும் தேர்வாகும் முதல் மூன்று படைப்புகள் மாநில அளவிலான போட்டிக்கு தகுதிபெறும்.. செப்டம்பர் 5 அன்று நடைபெறும் விழாவில் பாராட்டுச் சான்றிதழ்கள் வழங்கப்படும்...

மாநில அளவில் தேர்வான படைப்புகள் விஞ்ஞானச்சிறகு, விழுது, துளிர், அறிவுத்தென்றல் போன்ற இதழ்களில் வெளியிடப்படும்.. தனிப்புத்தகமாகவும் கொண்டுவரப்படும்..

தே.சுந்தர்
மாநில ஒருங்கிணைப்பாளர், கல்வி உபகுழு, தமிழ்நாடு அறிவியல் இயக்கம்

அலைபேசி: 9488011128

பொதுப்பள்ளியின் நாயகன் : பேரா.என்.மணி

தமிழ்நாட்டில் பாகுபாடற்ற பொதுப்பள்ளிக் கல்வி முறை பெருமளவு சீரழிந்துள்ளது. சமச்சீர் கல்வி என்ற பெயரில் உள்ள சமச்சீரான பாடத்திட்டம் கூட கடுமையான இந்திய மாணவர் சங்க போராட்டத்திற்கு பிறகு கொண்டு வரப்பட்டதுதான். அதுவும் கூட பல்வேறு தடைகள் தாண்டி உச்சநீதிமன்றம் சென்றபிறகு அமுல்படுத்தப்பட்டது. சமச்சீர் கல்வி என்ற சொல்லாடல் கடந்த ஆட்சிக்காலத்தில் உருவாக்கப்பட்டதால் தற்போதைய அரசு அச்சொல்லையே பயன்படுத்தக் கூடாதென கல்வித்துறை அதிகாரிகளுக்கு மறைமுக உத்தரவிட்டுள்ளது.

சமச்சீர் கல்வி என்று பேசப்படுகிற பொதுப்பாடத்திட்டம் அறிமுகப்படுத்தப்பட்டு ஆண்டுகள் மூன்றாகியும் முன்பிருந்த அரசுப் பள்ளி, மெட்ரிக் பள்ளி, ஆங்கிலோ இந்திய பள்ளி, ஓரியண்டல் பள்ளி என்ற நால்வகை வாரியங்களையும் இணைந்து ஒரு வாரியமாக மாற்றி அறிவிக்கக்கூட இன்னமும் இயலவில்லை. இதற்காக ஒரு வழக்கு உயர்நீதிமன்றத்தில் போடப்பட்ட பிறகுதான் “மாற்றும் எண்ணம் உள்ளது; பதில் மனுதாக்கல் செய்ய கால அவகாசம் தேவை” என அரசு கேட்டுள்ளது. பாகுபாடில்லாத அனைவருக்கும் சமமான கல்வி இனி இல்லை. ஏழைக்கு ஒரு கல்வி, பணக்காரனுக்கு ஒரு கல்வி என்பது நீதியாகவே மாறிவிட்டது.

எனவே, எப்பாடுபட்டாயினும் நமது பிள்ளைகளை தரமானதாக கூறப்படும் தனியார் பள்ளிகளில் சேர்ப்போம் என்று அவரவர் வருவாய் பிரிவுக்கு தக்க தனியார் பள்ளிகளை நாடத்துவங்கிவிட்டனர். அரசும் தன் பங்கிற்கு நிதி இல்லை என காரணம் கூறி அரசுப்- பள்ளிகளை வலுப்படுத்தாமல் தனியார் பள்ளிகளை ஊக்கப்படுத்தியும் அதன் வழியாக மூலதன சுரண்டலை ஊக்குவித்தும் வருகிறது. இதன் விளைவாக தமிழக தொடக்கக் கல்வி குத்துயிரும் குலையிருமாய் கிடக்கிறது. தொடர்ந்து பள்ளிகள் மூடப்படுவதையும் மூடப்பட இருப்பதையும் மூடப்படும் அபாயத்தில் இருக்கும் பள்ளிகளைப் பற்றியும் நாள்தோறும் செய்திகள் வந்தவண்ணமே இருக்கிறது.

இந்நிலையில் பொதுக்கல்விக்கு வித்திட்ட (இன்றைக்கு அது பெரும் சவாலுக்கு உள்ளாகியிருக்கிற) காமராஜர் பிறந்த நாளை கல்வி வளர்ச்சி நாளாக தமிழக அரசு பெயரளவிற்கேனும் கொண்டாடுவது மகிழ்ச்சிக்குரியது. அனைவருக்கும் சமமான தரமான கட்டாய இலவச கல்வி வேண்டுமென போராடும் அனைவரும் இந்த நாளுக்கு மிகுந்த முக்கியத்துவம் அளிக்க வேண்டும். பொதுப்பள்ளி முறையை மீண்டும் வலுப்படுத்த புதிய சபதங்களையும், மேற்கொள்ளும் நாளாக இந்நாளை கைக் கொள்ள வேண்டும்.

தேசத்தின் முன்னேற்றத்திற்கு கல்வி ஆணிவேர் கல்வி பெறும் உரிமையை பரவலாக்க வேண்டும் என்று கனவு கண்டனர், தேசபக்த முன்னோடிகளான பகத்சிங் மகாத்மா காந்தி, கோபாலகிருஷ்ண கோகலே போன்றோர். இக்கனவை நனவாக்க சுதந்திர இந்தியாவின் முதல் கல்வி அமைச்சரான மௌலானா அபுல் கலாம் ஆசாத்தும் சட்டமேதை மாமேதை அம்பேத்கரும் பெரும் முயற்சிகள் மேற்கொண்டனர். 14வயது உட்பட்ட அனைவருக்கும் கட்டாய கல்வி உரிமையை அரசியல் சாசனத்தின் வழியாக கொண்டுவருவதற்கு அன்றே முயற்சிகள் மேற்கொண்டனர். ஆனால் இந்த குழுவிற்கு தலைவராக இருந்த சர்தார் வல்லபாய் படேல் நிதி இல்லை என்று காரணம் கூறி அடிப்படை உரிமையில் சேர்க்கப்படவேண்டிய சட்டப்பிரிவை வழிகாட்டும் நெறிமுறையில் கொண்டு சேர்த்து கல்வி உரிமையை முடக்கினார். இன்றுவரை கல்வி உரிமை ஈடேறவில்லை. கல்வி உரிமை சட்டத்திற்கு பிறகும் அது கனவாகவே நீடிக்கிறது.

மத்திய அரசின் நிதி இல்லை என்று காரணம் கூறி 14வயதுக்குட்பட்டோரின் கல்விக்கு துரோகம் இழைத்த நிகழ்விற்கு சவால் விடும் வகையில் இரண்டு முக்கிய தலைவர்கள் தாங்கள் முதல்வராக இருந்த மாநிலங்களில் கல்விப் பணிகளை துவக்கினர். ஒருவர் காமராஜர். மற்றொருவர் கேரளாவின் முதல்வராக இருந்த இ.எம்.எஸ். நம்பூதிரிபாத். காமராஜர் ஆட்சிக்கு வந்தவுடன் அனைவருக்கும் ஒரே மாதிரியான பாகுபாடற்ற பொதுப்பள்ளிகளை (அரசுப் பள்ளிகள்) திறந்தார். 3 கிமீக்கு ஒரு தொடக்கப் பள்ளி, 5 கிமிக்கு ஒரு உயர்நிலைப்பள்ளி, என்ற முடிவை எடுத்தார். அப்பள்ளிகளில் பயில வரும் மாணவர்களின் வருகையை உத்தரவாதம் செய்ய சீருடை, நோட்டுபுத்தகம், மத்திய உணவு என வலுவான பொதுப்பள்ளியை விஸ்தரித்துக் கொண்டே சென்றார். அவருக்கும் “நிதி இல்லை கஜானா காலி தனியாரை நாடலாம்” என்று அதிகாரிகள் ஆலோசகர்கள் ஆலோசனைகள அள்ளித்தெளித்தனர். இவர்களது ஆலோசனைகளையெல்லாம் உள்வாங்கிக் கொண்டு பள்ளி சீரமைப்பு மாநாடுகளை நடத்தத் துவங்கினார். இம்மாநாடுகளில் தனியாரின் தாரளமான நிதி பொதுப்பள்ளிகளுக்கு கோரினார். அரசுப் பள்ளிகள் வளர்ந்தது. பள்ளிகள் மட்டும் அரசின் முழுக்கட்டுப்பாட்டில் வந்த்து. இன்ரைய PPP Public Private partnership முன்மாதிரி பள்ளிகள் அன்று கூறி அரசுப் பள்ளிகளை தனியாருகு தாரைவார்ப்பதற்கு மாற்றான முறைகளை அன்றே உருவாக்கி காட்டினார். இந்தப் பள்ளிகளில் சாதி, மதம், ஏழை, பணக்காரன் என்ற ஏற்றத்தாழ்வின்றி கல்வி வழங்கப்பட்டது. பாடப்புத்தகம் வழியாகவும் இத்தகைய பள்ளி முறையின் வழியாகவும் மாணவர்கள் பாடம் பயின்றனர்.

தமிழகம் இன்று அடைந்துள்ள முன்னேற்றத்தில் ஆரோக்கியமான விஷயங்களில் இந்தக் கல்வி முறைக்கும் அதில் பயின்று வளர்ந்தவர்களுக்கும் முக்கிய பங்கு உண்டு. அவ்வாறு உருவாக்கப்பட்ட பள்ளிகள் தான். இன்று தொடர்ந்து மூடப்பட்டு வந்திருகின்றன. எங்கள் ஆட்சிதான் உண்மையான காமராசர் ஆட்சி என்று சொல்லிக்கொள்ளுபவர்கள் காமராசர் ஆட்சியை இனிமேல்தான் உருவாக்கப்போகிறோம் என்று சொல்பவர்கள் எல்லோரும் சேர்ந்து அரசுப் பள்ளிகளுக்கு திவசம் செய்துவருகிறார்க்ள். தங்கள் பங்கிற்கு ஆளுக்கொரு தனியார் பள்ளி கட்டிக் கொண்டு இடரற்ற லாபம் ஈட்டியும் வருகிறார்கள் . மெட்ரிக் பள்ளிகள், சிபிஎஸ்சி பள்ளிகள் சர்வதேச பள்ளிகள் என பள்ளிக் கல்வி புற்றீசல் போல் தனியார்மயம் பெருகிக் கொண்டே செல்கிறது.

“அரசுப் பள்ளிகளில் எவ்வளவு குறைபாடுகள் இருந்தாலும் தனியர் பள்ளிகள் அவற்றில் ஈடுகட்ட முடியாதென்று அதன் உள்ளார்ந்த காரணத்தை வைத்துதான் அமர்த்தியா சென் கூறுகிறார். காமராசர் அரும்பாடுபட்டு உருவாக்கிய பொதுப்பள்ளி முறை பள்ளிக்கல்வி முழுவதும் அரசின் பொறுப்பிலும் பாகுபாடின்றியும் கொடுக்கப்படவேண்டியது இன்றைய தேவை. தமிழ்நாட்டிற்கு மட்டுமல்ல இந்தியாவிற்கே காமராசர் துவங்கிய பொதுப்பள்ளி ஒரு முன்மாதிரி. பொதுப்பள்ளி என்றால் நம் நினைவுக்கு காமராசர் வருவது போல் அடுத்து நினைவுக்கூரப்படவேண்டியவர் இ.எம்.எஸ். உலக கம்யூனிச இயக்க வரலாற்றில் அவர்கள் ஆட்சிக்கு வந்தவுடன் செய்த முதல் கடமையை இஎம்எஸ்ஸும் கேரளாவில் துவங்கினார். அனைவருக்கும் தரமான சமமான கல்வியை வழங்கும் கேரள கல்வி மாசோதாவை உருவாக்கினார். கல்வி வியாபாரிகள் கொந்தளித்தனர். உச்சநீதிமன்றம் இம்மாசோதா சரியானதென்று தீர்ப்பளித்தது. இருந்தபோதும் இஎம்எஸ்சின் அரசு இந்த கல்வி மசோதாவிற்காகவே கவிழ்க்கப்பட்ட்து. ஒரு ஜனநாயக குடியரசின் அடிப்படை கடமையே அனைவருக்கும் சமமான தரமான இலவசமான கல்வியை வழங்கவேண்டியதே. அதை இத்தனை ஆண்டுகள் போராடியும் பெறமுடியவில்லை. ஆனால் இக்கல்வி அடிப்படை உரிமைக்காக போராடுபவர்களுக்கு காமராசரும், இஎம்எஸ்ஸும் எப்போதும் உயிரோட்டமான உந்துசக்தியாகவே இருப்பார்கள்.

கட்டுரையாளர் முனைவர் நா.மணி,

மாநிலத் தலைவர்,

தமிழ்நாடு அறிவியல் இயக்கம்.

தமிழ்நாடு : மோசமான நிலை - கே. சத்யநாராயன்

குறிப்பிட்ட ஆண்டில் கல்விக்காக எத்தனை சதவிகிதம் பட்ஜெட்டில் ஒதுக்கப்பட்டது, எத்தனை பள்ளிகள் கட்டப்பட்டன, பள்ளிக் கட்டட உருவாக்கத்துக்கு எவ்வளவு செலவானது போன்ற தகவல்கள் நமக்குக் கிடைக்கும். சரி, இந்தப் பள்ளிகளில் கற்பிக்கப்படும் பாடங்களின் தரம் என்ன? ஒரு மாணவன் வகுப்பறையில் இருந்து உண்மையில் என்னென்ன கற்றுக்கொள்கிறான்?

தமிழ்நாட்டின் கல்வித் தரம் குறித்து ஆறு மாதங்களுக்கு முன்பு இரண்டு ஆய்வறிக்கைகள் வெளிவந்தன. அவற்றின் முடிவுகள் அதிர்ச்சியூட்டுவதாக உள்ளன.

அறிக்கை 1:

PISA (Programme for International Student Assessment), 2011

உலகம் முழுவதும் 73 நாடுகளில் இந்த அமைப்பு ஆய்வுகளை மேற்கொண்டது. இந்தியாவில், தமிழ் நாடு மற்றும் இமாசலப் பிரதேசத்தைச் சேர்ந்த 15 வயதுக்கு உட்பட்ட 5,000 மாணவர்கள் பங்கேற்றனர். தமிழ், இந்தி, ஆங்கிலம் ஆகிய மொழிகளில் 2 மணி நேரம் தேர்வு எழுதினார்கள்.

• தமிழ்நாட்டில் 100 மாணவர்களில் 17 பேரால் மட்டுமே சரளமாக வாசிக்கமுடிகிறது. 15 பேருக்கு மட்டுமே அடிப்படை கணிதம் தெரிந்திருக்கிறது. அடிப்படை அறிவியல் அறிவும் 15 பேருக்கு மட்டுமே இருக்கிறது.
•  முதல் வரிசையில் இருக்கும் சீனாவோடு ஒப்பிட்டால்தான் தமிழ்நாடு எந்த அளவுக்கு பின்தங்கியிருக்கிறது என்பது தெரியும். சீனாவில் 100 பேரில் 95 பேரால் சரளமாக வாசிக்கமுடியும். 95 பேருக்கு அடிப்படை கணிதமும் அறிவியலும் தெரியும்.
• முடிவு: தேர்வில் பங்கேற்ற 73 நாடுகளில் இந்தியாவுக்குக் கிடைத்த இடம், 72.

அறிக்கை 2:

ASER (Annual Szazus of Educazion Reporz), 2011

ப்ரீத்தம் என்னும் தனியார் தொண்டு நிறுவனத்தின் 7வது வருடாந்தர ஆய்வறிக்கை இது.

• கிராமப்புறங்களில், 3வது வகுப்பில் படிக்கும் 70 சதவிகித மாணவர்களால் 1ம் வகுப்புக்குண்டான விஷயங்களைப் படிக்கமுடியவில்லை. 5ம் வகுப்பு மாணவர்களில் 65 சதவிகிதம் பேரால் 2ம் வகுப்புக்கான விஷயங்களை படிக்கமுடியவில்லை. 20 சதவிகிதம் பேரால் 100 வரையிலான எண்களைக் கண்டறியமுடியவில்லை. 80 சதவிகிதம் பேரால் வகுத்தல் கணக்கைப் போட முடியவில்லை.
• முடிவு: தமிழ்நாட்டில் கல்வித் தரம் மிகவும் கவலையளிக்கும்படி இருக்கிறது என்று தொடர்ந்து இந்த நிறுவனம் ஆதாரபூர்வமாகச் சொல்லிவருகிறது என்றாலும் தமிழ்நாடு அரசு ஒவ்வொருமுறையும் இந்த அறிக்கையை உதாசீனம் செய்துவருகிறது.

அபாயகரமான இந்த நிலைமைக்கு அரசுப் பள்ளிகள், தனியார் பள்ளிகளும் இரண்டுமே சமஅளவில் பொறுப்பேற்கவேண்டும்.

நன்றி: ஆழம் மாதாந்திர இதழ்

ஆசிரியர் தகுதித் தேர்வு தேவையா? - கி. ரமேஷ்

முன்பெல்லாம், ஆசிரியர் பயிற்சி முடித்ததும் அனைவரும் ஆசிரியர் தேர்வு வாரியத்தில் பதிவு செய்துகொள்வார்கள். சீனியாரிடி அடிப்படையில் நியமனம் செய்யப்படும். 199196ல், அதிமுக ஆட்சியின்போதுதான் முதன்முதலாக இந்த நடைமுறை அகற்றப்பட்டு தகுதித் தேர்வு அமல்படுத்தப்பட்டது. அப்போது, பல்லாயிரக்கணக்கான ஆசிரியர்கள் நியமனம் பெற்றனர். பல முறைகேடுகள் நடைபெற்றதாகக் கூறப்பட்டாலும் அந்தத் தேர்வு முறையாகவே நடந்தது என்பதை மறுக்க முடியாது. ஆனால், அப்படித் தேர்வு செய்யப்பட்ட ஆசிரியர்கள் தமது சொந்த ஊரிலிருந்து வெகுதூரத்தில் நியமிக்கப்பட்டார்கள்.  கன்னியாகுமரியில் இருப்பவர்களை சென்னைக்கும், சென்னையில் இருப்பவர்களை மதுரைக்கும், திருநெல்வேலிக்கும் தூக்கி அடித்தார்கள்.

1996ல், திமுக ஆட்சிக்கு வந்ததும் உடனடியாக அவர்களுக்கெல்லாம் விரும்பிய இடத்துக்கு மாற்றம் கொடுக்கப்பட்டு பிரச்னை தீர்க்கப்பட்டது. பணி நியமனம் பழையபடி மூப்பு அடிப்படைக்கு மாறியது. இப்போது, அதிமுக ஆட்சி அனைத்தையும் மாற்றுவதுபோல் மீண்டும் தகுதித் தேர்வுக்கு மாறியுள்ளது.

இருபுறத்திலும் இதற்கான காரணங்கள், எதிர்க் கருத்துகள் முன்வைக்கப்படுகின்றன. ஆசிரியர் தகுதித் தேர்வு வைக்கக்கூடாது. மூப்பு அடிப்படையிலேயே நியமனம் செய்ய வேண்டுமென்று போடப்பட்ட வழக்கு, உச்சநீதி மன்றம் வரை சென்று தோற்றுவிட்டது. தகுதித் தேர்வே சரி என உச்சநீதி மன்றம் கூறியுள்ளது. மத்திய அரசு கல்வி உரிமைச் சட்டத்தை இயற்றியதோடு, ஆசிரியர்களுக்கு மீண்டும் ஒரு தகுதித் தேர்வையும் புகுத்தியுள்ளது. இதை ஆசிரியர் நியமனத்துக்காகக் காத்திருப்போரும் ஆசிரியர் சங்கங்களும் எதிர்க்கின்றனர்.

ஏற்கெனவே பயிற்சி முடித்து தகுதி பெற்றுள்ள நிலையில் இன்னுமொரு தேர்வா என்பதுதான் ஆசிரியர்களின் கேள்வி. எனினும், இந்தத் தேர்வு அறிவிக்கப்பட்டதும் பல லட்சம் பேர் வேறு வழியின்றி விண்ணப்பித்துள்ளனர். கல்வி வியாபாரமாகும் சூழலில் மாணவர்களைப் போல் ஆசிரியர்களும் மார்க் பெறும் மெஷின்களாக மாறவேண்டிய சூழல் ஏற்பட்டுள்ளது. இந்நிலையில், பிற தொழில்களைப் போல் ஆசிரியர் தொழிலையும் கருதாமல் இருக்கவேண்டுமே என்னும் கவலையும் பிறக்கிறது.

மற்றொரு பக்கம், ஆசிரியர் படிப்பு படித்துவிட்டு வருடக் கணக்கில் காத்திருந்தும் நியமனம் கிடைக்காமல் பலர் தவிக்கிறார்கள். தனியார் பள்ளிகளோ மாணவர்களிடம் இருந்து பெரும் பணம் கறந்துகொண்டாலும், ஆசிரியர்களுக்கு குறைவான சம்பளத்தையே அளிக்கின்றன. அனைவருக்கும் நல்ல கல்வி கிடைக்கவேண்டுமென்றால் மாணவர்கள் பிரச்னைகளோடு சேர்த்து ஆசிரியர்களின் பிரச்னைகளையும் இனம் கண்டு களையவேண்டும்.

நன்றி: ஆழம் மாதாந்திர இதழ்

கல்வி உரிமைச் சட்டம் : குறைபாடுகள் - பல்லவன்

1.  குழந்தைகள் பெறும் கல்வியின் தரத்தைப் பற்றி சட்டம் கண்டுகொள்ளவில்லை.

குழந்தைகள் கற்றுக்கொள்கிறார்களா என்பது பற்றி சட்டம் இயற்றுபவர்கள் கவலைப்படவே இல்லை. பள்ளி இருக்கவேண்டும், வகுப்பறை இருக்கவேண்டும், ஆசிரியர் இருக்கவேண்டும் என்றெல்லாம் சொல்பவர்கள், அவற்றைக்கொண்டு எவ்விதமான கல்வியை மாணவர்களுக்குத் தரவேண்டும் என்பது பற்றி ஒன்றுமே சொல்லவில்லை. அதைவிட மோசமாக,மாணவர்கள் கற்றுக்கொண்டிருக்கிறார்களா இல்லையா என்பதைத் தீர்மானிக்காமல் அவர்கள் கற்றுக்கொள்ளாவிட்டாலும் அவர்களை அடுத்த வகுப்புக்கு அனுப்பிவிடவேண்டும் என்கிறது சட்டம். கணிதத்தில் கூட்டல், கழித்தல் தெரியாவிட்டாலும் மாணவர்களுக்கு பெருக்கல், வகுத்தல் சொல்லிக்கொடுக்கப்படவேண்டும். இவை எதுவும் தெரியாவிட்டாலும் உயர் கணிதத்தைச் சொல்லித்தரவேண்டும் என்கிறது சட்டம்.

2.  பள்ளிகளை அதிகப்படுத்த விரும்புகிறது சட்டம். மாறாக, பள்ளிகள் குறைவதற்கே சாத்தியம் அதிகம்.

ஒவ்வொரு பள்ளிக்கும் இத்தனை இடம் இருக்கவேண்டும், இத்தனை மாணவர்களுக்கு இத்தனை ஆசிரியர்கள் இருக்கவேண்டும், ஒவ்வோர் ஆசிரியருக்கும் குறிப்பிட்ட தகுதி இருக்கவேண்டும், ஆசிரியர்களுக்கு அரசு குறிப்பிடும் சம்பளம் தரப்படவேண்டும் என்கிறது சட்டம். இந்த விதிமுறைகளில்        அடங்காவிட்டால் பள்ளியின் அனுமதி குறிப்பிட்ட காலத்துக்குள் ரத்து செய்யப்படும் என்றும் சொல்கிறது சட்டம்.

இன்றைய தேதியில் மிகப் பெரும்பான்மையான தனியார் பள்ளிகளிடம் அரசு கோரும் இடம் இல்லை. ஆசிரியர்களுக்கு அவர்கள் தரும் சம்பளமும் குறைவு. இவற்றையெல்லாம் சரி செய்வதற்கு வாய்ப்பே இல்லை. நகரங்களில் பள்ளிகளை விரிவாக்க இடமே இல்லை. கட்டணங்கள் கட்டுப்படுத்தப்பட்ட நிலையிலும் 25% இட ஒதுக்கீட்டுக்கு அரசு தரும் கட்டணம் குறைவாக இருக்கும் நிலையிலும் ஆசிரியர்களுக்கு அரசு தீர்மானிக்கும் சம்பளத்தைக் கொடுக்க பெரும்பான்மைத் தனியார் பள்ளிகளால் முடியவே முடியாது.

எனவே, இந்தப் பள்ளிகள் ஒன்று தாமாகவே கல்வித் துறையிலிருந்து விலகிக்கொள்ளும். அல்லது சட்டத்தின்படி அவர்களது அங்கீகாரம்  ரத்து செய்யப்படும். அரசிடம் புதிய பள்ளிகளை உருவாக்கத் தேவையான பணம் இல்லை என்பதால்தான் தனியார் கல்விக்கூடங்களில் 25% இடத்தை அரசு கேட்டுப் பெற்றது. இப்போது, தனியார் பள்ளிகள் மூடப்பட்டால் அங்கு படிக்கும் குழந்தைகள் அனைவரையும் எங்கு        கொண்டுபோய் சேர்ப்பது?

3. தனியார் யாருக்கும் புதிதாகப் பள்ளிக்கூடம் கட்ட ஊக்கம் வரப்போவதில்லை.

இதுவரை, குறிப்பாக எந்தச் சட்டமும் கல்வி நிறுவனங்கள் லாபம் சம்பாதிக்கக்கூடாது என்று சொன்னதாகத் தெரியவில்லை. அவ்வப்போது சில உச்ச நீதிமன்றத் தீர்ப்புகள் இவ்வாறு சொல்லியுள்ளன. ஆனால்,        நடைமுறையில் பெரும்பாலான தனியார் பள்ளிகள் ஏதோ ஒருவகையில் லாபம் சம்பாதித்துதான் வந்துள்ளன. இப்போது கல்வி உரிமைச் சட்டம் மிகத் தெளிவாக, கல்விக்கூடங்கள் அனைத்தும் லாப நோக்கு அற்றவையாகவே இருக்கவேண்டும் என்று சொல்லிவிட்டது.

லாப நோக்கு இல்லை என்றால் லாபத்தை விரும்பும் யாருமே பள்ளிகளைக் கட்டப்போவதில்லை. இப்போது நடப்பதைப் போல, சட்டத்தைப் பற்றிக்        கவலைப்படாதவர்கள்தான், தவறு என்று   தெரிந்தும்கூட கல்விக்கூடங்களைக் கட்டி முறையற்ற வழியில் லாபம் சம்பாதிக்கப்போகிறார்கள். இவர்கள் யாருக்கும் கல்வியின்மீது அக்கறை கிடையாது. மொத்தத்தில் லாபத்தை விலக்குவதன் மூலமாக, நிஜமாகவே கல்வியின்மீது அக்கறை கொண்ட, சட்டபூர்வமாக நடந்துகொள்ளக்கூடிய நிறுவனங்கள் அனைத்தும் கல்வித்துறையில் இருக்கவே போவதில்லை. இதனால் நஷ்டம் பொதுமக்களுக்குத்தான்.

4.  தனியார் பள்ளிகள்மீது விதிக்கப்படும் கடுமையான கட்டுப்பாடுகள் எவையுமே அரசுப் பள்ளிகளுக்குக் கிடையாது.

தமிழகத்தில் எத்தனையோ அரசுப் பள்ளிகளில் தேவையான ஆசிரியர்கள் கிடையாது. ஆசிரியர்மாணவர் விகிதம் பல அரசுப் பள்ளிகளிலும் படுமோசமாக உள்ளது. மிகப் பெரும்பான்மையான அரசுப் பள்ளிகளில் கழிவறை வசதி தொடங்கி, குடிநீர் வசதிவரை எந்தவித அடிப்படைத் தேவையுமே        சரியில்லை. இந்த வசதிகள் இல்லாத எந்தத் தனியார் பள்ளியையும் அரசால் மூடமுடியும். ஆனால், தன் பள்ளிகளில் இந்த வசதி இல்லை என்றால் அரசு என்ன செய்யும் என்பது சட்டத்திலேயே இல்லை. இந்த வசதிகள் ஒருவேளை நாளடைவில் அரசுப் பள்ளிகளில் ஏற்படலாம் என்று வைத்துக்கொண்டால்கூட, அதற்கென கெடு ஏதும் விதிக்கப்படவில்லை. ஆனால், தனியார் பள்ளிகளுக்குக் கடுமையான கெடு இருப்பதுடன், இந்தப் புதிய வசதிகளைச் செய்து தருவதற்காக அரசு மானியம் ஏதும் தருவதாகவும்        சொல்லவில்லை. அதே நேரம், தமிழகத் தனியார் பள்ளிகள் வசூலிக்கும் கட்டணம் கட்டுப்படுத்தப்படுகிறது. மேற்கொண்டு 25%  மாணவர்களுக்கான கட்டணம் குறைக்கப்படப்போகிறது. இதைத் தாண்டி எப்படி அந்தப் பள்ளி இந்த வசதிகளைச் செய்துதரப்போகிறது என்பது பற்றி சட்டம் கவலைப்படவே இல்லை. அரசுப் பள்ளிகளில் வசதிகள் சரியில்லை என்றால் யார்மீது நடவடிக்கை எடுக்கப்படும் என்றும் சட்டம் சொல்லவில்லை.

5. அரசுப் பள்ளி அல்லது அரசு உதவி  பெறும் பள்ளி ஒவ்வொன்றிலும் பள்ளி நிர்வாகக் குழு என்றொரு குழு அமைக்கப்படவேண்டும். ஆசிரியர்கள் ஒழுங்காகப் பள்ளிக்கு வருவதையும் ஆசிரியர்கள் பிரத்யேகமாக டியூஷன் நடத்தாமல் இருப்பதையும் இந்த நிர்வாகக் குழுதான் செயல்படுத்தவேண்டும் என்கிறது சட்டம். ஆனால், அதற்கேற்ற எந்த  அதிகாரத்தையும் இந்தக் குழுவுக்குச் சட்டம் வழங்கவில்லை. தவறு செய்யும் ஆசிரியர்களை நீக்கும் அதிகாரம் இந்த நிர்வாகக் குழுவுக்கு அளிக்கப்படவில்லை. எனவே நிர்வாகக் குழுவால் தமக்குக் கொடுக்கப்பட்டிருக்கும் பணிகளை ஒழுங்காகச் செய்ய முடியாது.

இந்தச் சட்டம் பல்வேறு ஆட்கள் எதைச் செய்யவேண்டும், எதைச் செய்யக்கூடாது என்று சொல்கிறது ஆனால், ஒருவர் ஒரு செயலைச் செய்யவில்லை என்றால் என்ன தண்டனை, செய்யாவிட்டால் யார் அவரைச் செய்ய வைப்பது என்று எதுவுமே சொல்லப்படவில்லை. மொத்தத்தில் எந்தவிதச் சிந்தனையும் இன்றி இயற்றப்பட்ட ஒரு சட்டமாகவே தெரிகிறது.

0

பெட்டிச் செய்தி

சிக்கல்களே அதிகம்!

கல்வி உரிமைச் சட்டம் பல சிக்கலான கேள்விகளை எழுப்பியுள்ளது. நாடு முழுவதிலும் சீர்குலைந்து கிடக்கும் அரசுப் பள்ளிகளை மேம்படுத்தாமல், 25 சதவிகிதம் இடம் அளிக்குமாறு தனியார் பள்ளிகளைக் கட்டாயப்படுத்துவது எந்த வகையில் நியாயம்? வரும் நாள்களில் இந்த 25 என்பது 50 அல்லது 60 சதவிகிதமாக உயராது என்பதற்கு என்ன உத்தரவாதம்?  இந்த 25 சதவிகித மாணவர்கள் கல்வி கற்பதற்கு ஆகும் செலவை அரசுப் பள்ளிகளுக்கு எப்படிப் பட்டுவாடா செய்யப்போகிறது?

கல்வி கற்பிப்பதற்கான அடிப்படை வசதிகளை அனைத்துப் பள்ளிகளும் கொண்டிருக்கவேண்டும் என்பதும் அதற்கான விதிமுறைகள் வகுக்கப்படவேண்டும் என்பதும் வரவேற்கத்தக்க முடிவுதான். விதிமுறைகளுக்குப் பொருந்தாத மற்றும் அரசு அங்கீகாரம் பெறாத பள்ளிகள் இனி தடை செய்யப்படும் என்கிறது சட்டம். இந்த விதிகளால் அதிகம் பாதிக்கப்படப்போவது என்னவோ தனியார் பள்ளிகள்தாம். தனியார் பள்ளிகள் குறித்த அடிப்படை புள்ளிவிவரங்கள் எதையும் தெரிந்துகொள்ளாமலேயே இப்படியொரு சட்டம் வகுக்கப்பட்டுள்ளது வேதனைக்குரியது.

நான் ஒரு தீர்வை முன்வைக்க விரும்புகிறேன். 25 சதகிவிதம் மாணவர்களுக்கான கட்டணத்தைச் சம்பந்தப்பட்ட பள்ளிகளுக்கு வழங்குவதற்கு பதி லாக, குழந்தைகளின் பெற்றோருக்கு கூப்பன் வடிவில் வழங்கிவிடலாம். எந்தப் பள்ளியில் தங்கள் குழந்தையைச் சேர்க்கவேண்டும் என்பதை பெற்றோர் தீர்மானித்துக்கொள்ளட்டும்.எது தரமான பள்ளி, எதில் சேர்ப்பது எதிர்காலத்துக்கு நல்லது என்பதை அவர்களே ஒப்பிட்டுப் பார்த்து முடிவு செய்துகொள்ளட்டும். பண விநியோகம் தொடர்பான ஊழலையும் இதன் மூலம் கட்டுப்படுத்தமுடியும்.

(பா. சந்திரசேகரன், ஆலோசகர், மத்திய திட்டக்குழு. இது கட்டுரையாளரின் தனிப்பட்ட கருத்து).

நன்றி: ஆழம் மாதாந்திர இதழ்